ភ្នំពេញ៖ គណៈប្រតិភូសង្កេតការណ៍អន្តរជាតិ និងភ្ញៀវពិសេសសរុបចំនួនជាង៦០០នាក់មកពីជាច្រើនប្រទេស នឹងអញ្ជើញមកកម្ពុជាដើម្បីចូលរួមសង្កេតការណ៍បោះឆ្នោតជ្រើសតាំងតំណាងរាស្ត្រនីតិកាលទី៧ខាងមុខនេះ។ គណៈប្រតិភូសង្កេតការណ៍បរទេសជាច្រើនរូបបានអញ្ជើញមកដល់កម្ពុជាប្រកបដោយសុវត្ថិភាពជាបន្តបន្ទាប់ និងមានគណៈប្រតិភូសង្កេតការណ៍ជាច្រើននាក់ទៀតកំពុងតែធ្វើដំណើរមកកាន់កម្ពុជា។

គិតត្រឹមថ្ងៃទី២០ ខែកក្កដា នេះមានគណៈប្រតិភូសង្កេតការណ៍បរទេសជាច្រើនរូបមកពីប្រទេសនានាបានមកដល់កម្ពុជាមានដូចជា នាយករដ្ឋមន្ត្រីនៃសាធារណរដ្ឋហ្គីណេប៊ីស្សូ គណៈប្រតិភូអ្នកសង្កេតការណ៍អន្តរជាតិ នៃប្រទេសម៉ាល់ឌីវ អញ្ជើញមកដល់អាកាសយានដ្ឋានអន្តរជាតិភ្នំពេញ គណៈប្រតិភូអ្នកសង្កេតការណ៍ ICAPP ប្រធានអង្គការអ្នកប្រជាធិបតេយ្យនិយមកណ្តាលអន្តរជាតិ គណៈប្រតិភូសមាគមសមាជិកសភាអន្តរជាតិដើម្បីសន្តិភាព និងបណ្តាគណៈប្រតិភូអ្នកសង្កេតការណ៍អន្តរជាតិជាច្រើនរូបទៀត។

សម្តេចតេជោ បានសរសេរសារតាមតេឡេក្រាមនៅថ្ងៃនេះ ដោយបានអរគុណចំពោះលោកប្រធានសភា ប្រទេសម៉ាឡេស៊ី និងនាយករដ្ឋមន្ត្រី នៃសាធារណរដ្ឋហ្គីណេប៊ីស្សូ អតីតប្រមុខរដ្ឋប្រមុខរដ្ឋាភិបាល អតីតប្រធាន អនុប្រធានរដ្ឋសភាទាំង១១រូបដែលបានចំណាយពេលវេលាធ្វើដំណើរមកកាន់កម្ពុជា។ ព្រមទាំងស្វាគមន៍ដល់ប្រតិភូសង្កេតការណ៍បរទេសចំនួន៣៣៣រូបដែលនឹងមកចូលរួមក្នុងដំណើរការបោះឆ្នោត។

អគ្គនាយកដ្ឋានព័ត៌មាន និងសោតទស្សន៍ នឹងរៀបចំធ្វើសិក្ខាសាលាស្តីពីការចូលរួមសង្កេតការណ៍សម្រាប់អ្នកសង្កេតការណ៍អន្តរជាតិចាប់ពីថ្ងៃទី២១-២២ និងថ្ងៃទី២៤ ខែកក្កដា ឆ្នាំ២០២៣ នៅសណ្ឋាគារសុខា៕